|| लक्ष्मीकवचम् ||
नारद उवाच
आविर्भूय हरिस्तस्मै किं स्तोत्रं कवचं ददौ|
महालक्ष्म्याश्र्च लक्ष्मीशस्तन्मे ब्रूहि तपोधन||१||
नारायण उवाच
पुष्करे च तपस्तप्त्वा विरराम सुरेश्वरः|
आविर्बभूव तत्रैव क्लिष्टं दृष्ट्वा हरिः स्वयम्||२||
तमुवाच हृषीकेशो वरं वृणु यथेप्सितम्|
स च वव्रे वरं लक्ष्मीमीशस्तस्मै ददौ मुदा||३||
वरं दत्वा हृषीकेशः प्रवक्तुमुपचक्रमे|
हितं सत्यं च सारं च परिणामसुखावहम्||४||
श्रीमधुसुदन उवाच
गृहाण कवचं शक्र सर्वदुःखविनाशनम्|
परमैश्वर्यजनकं सर्वशत्रुविमर्दनम्||५||
ब्रह्मणे च पुरा दत्तं संसारे च जलप्लुते|
यद् धृत्वा जगतां श्रेष्ठः सर्वैश्वर्ययुतो विधिः||६||
बभूवुर्मनवः सर्वे सर्वैश्वर्ययुता यतः|
सर्वैश्वर्यप्रदस्यास्य कवचस्य ऋषिर्विधिः||७||
पङ्क्तिश्छश्र्च सा देवी स्वयं पद्मालया सुर|
सिद्धैश्वर्यजपेष्वेव विनियोगः प्रकीर्तितः||८||
यद् धृत्वा कवचं लोकः सर्वत्र विजयी भवेत्|
मस्तकं पातु मे पद्मा कण्ठं पातु हरिप्रिया||९||
नासिकां पातु मे लक्ष्मीः कमला पातु लोचनम्|
केशान् केशवकान्ता च कपालं कमलालया||१०||
जगत्प्रसूर्गण्डयुग्मं स्कन्धं सम्पत्प्रदा सदा|
ॐ श्रीं कमलवासिन्यै स्वाहा पृष्ठं सदावतु||११||
ॐ श्रीं पद्मालयायै स्वाहा वक्षः सदावतु|
पातु श्रीर्मम कङ्कालं बाहुयुग्मं च ते नमः||१२||
ॐ हृीं श्रीं लक्ष्म्यै नमः पादौ पातु मे संततं चिरम्|
ॐ हृीं श्रीं नमः पद्मायै स्वाहा पातु नितम्बकम्||१३||
ॐ श्रीं महालक्ष्म्यै स्वाहा सर्वाङ्गं पातु मे सदा|
ॐ हृीं श्रीं क्लीं महालक्ष्म्यै स्वाहा मां पातु सर्वतः||१४||
इति ते कथितं वत्स सर्वसम्पत्करं परम्|
सर्वैश्वर्यप्रदं नाम कवचं परमाद्भुतम्||१५||
गुरुमभ्यर्च्य विधिवत् कवचं धारयेत्तु यः|
कण्ठे वा दक्षिणे बाहौ स सर्वविजयी भवेत्||१६||
महालक्ष्मीर्गृहं तस्य न जहाति कदाचन|
तस्य छायेव सततं सा च जन्मनि जन्मनि||१७||
इदं कवचमज्ञात्वा भजेल्लक्ष्मीं सुमन्दधीः|
शतलक्षप्रजप्तोऽपि न मन्त्रः सिद्धिदायकः||१८||
|| इति श्रीब्रह्मवैवर्ते इन्द्रं प्रति हरिणोपदिष्टं लक्ष्मीकवचं सम्पूर्णम्||